राहुल गांधींच्या आंदोलनाचे नाशकात पडसाद; भाजपचा काँग्रेस कार्यालयावर धडक मोर्चा, पोलिसांनी रोखला

राहुल गांधींच्या आंदोलनाचे नाशकात पडसाद; भाजपचा काँग्रेस कार्यालयावर धडक मोर्चा, पोलिसांनी रोखला

नाशिक | प्रतिनिधी

दिल्लीत काँग्रेस नेते राहुल गांधी यांनी पंतप्रधान नरेंद्र मोदी यांच्या निवासस्थानाबाहेर केलेल्या आंदोलनाच्या निषेधार्थ नाशिकमध्ये भाजप युवा मोर्चाने मंगळवारी आक्रमक आंदोलन केले. राहुल गांधी यांच्या विरोधात जोरदार घोषणाबाजी करत भाजप कार्यकर्त्यांनी काँग्रेस कार्यालयावर निषेध मोर्चा नेण्याचा प्रयत्न केला. मात्र, पोलिसांनी वेळीच हस्तक्षेप करत कार्यकर्त्यांना अडवल्याने भाजप आणि काँग्रेस कार्यकर्त्यांमध्ये संभाव्य संघर्ष टळला.

भाजप युवा मोर्चाच्या कार्यकर्त्यांनी आंदोलनादरम्यान राहुल गांधी यांच्या विरोधात तीव्र घोषणाबाजी केली. तसेच राहुल गांधी यांचे पोस्टर पायदळी तुडवत निषेध व्यक्त करण्यात आला. कार्यकर्त्यांनी काँग्रेसच्या भूमिकेवर टीका करत राहुल गांधी यांच्या आंदोलनाचा निषेध नोंदविला.

दरम्यान, भाजप कार्यकर्ते काँग्रेस कार्यालयाच्या दिशेने पुढे सरकत असल्याची माहिती मिळताच पोलिसांनी परिसरात अतिरिक्त बंदोबस्त तैनात केला. काँग्रेस कार्यालयाकडे जाणाऱ्या मार्गावर कार्यकर्त्यांना अडवण्यात आले. काही काळ पोलिस आणि आंदोलनकर्त्यांमध्ये शाब्दिक वादही झाला. मात्र, पोलिसांनी संयमाने परिस्थिती हाताळल्याने कोणताही अनुचित प्रकार घडला नाही.

या आंदोलनामुळे काही काळ परिसरात तणावाचे वातावरण निर्माण झाले होते. पोलिसांच्या सतर्कतेमुळे कायदा व सुव्यवस्था अबाधित राहिली. भाजप युवा मोर्चाच्या कार्यकर्त्यांनी राहुल गांधी यांच्या आंदोलनाचा निषेध करत भविष्यातही अशा प्रकारच्या आंदोलनांना तीव्र विरोध केला जाईल, असा इशारा दिला.