नगरसेवक प्रविण तिदमे यांचा पुढाकार; तिडके नगरसह पाच परिसरांचा पाणी टायमिंगचा प्रश्न मार्गी..!

नगरसेवक प्रविण तिदमे यांचा पुढाकार; तिडके नगरसह पाच परिसरांचा पाणी टायमिंगचा प्रश्न मार्गी..!

सिडको प्रतिनिधी :-

 शहरातील तिडके नगर, कालिका पार्क, प्रियंका पार्क, जगताप नगर आणि दोंदे पूल परिसरातील नागरिकांसाठी महत्त्वाची बातमी समोर आली आहे. गेल्या दीड वर्षांपासून या परिसरांतील नागरिकांना भेडसावणाऱ्या पाणीपुरवठ्याच्या वेळेच्या समस्येवर तोडगा काढण्यात आला असून, आता पाणीपुरवठ्याची वेळ निश्चित करण्यात आली आहे. यापुढे संबंधित परिसरांमध्ये निश्चित केलेल्या वेळेनुसार पाणीपुरवठा होणार असल्याची माहिती प्रविण (बंटी)तिदमे यांनी दिली आहे.

गेल्या दीड वर्षांपासून पाणीपुरवठ्याच्या वेळेबाबत निश्चितता नसल्याने नागरिकांना विविध अडचणींचा सामना करावा लागत होता. पाणी नेमके कोणत्या वेळी येणार, याची खात्री नसल्यामुळे घरगुती कामांचे नियोजन करताना नागरिकांची गैरसोय होत होती. विशेषतः नोकरी करणारे नागरिक, महिला, ज्येष्ठ नागरिक आणि लहान मुलांच्या कुटुंबांना पाण्याचे नियोजन करणे अनेकदा अडचणीचे ठरत होते. पाणीपुरवठ्याच्या वेळेतील अनिश्चिततेमुळे नागरिकांना पाण्याचा साठा करून ठेवण्याचीही कसरत करावी लागत होती.

या पार्श्वभूमीवर तिडके नगर, कालिका पार्क, प्रियंका पार्क, जगताप नगर आणि दोंदे पूल या पाच परिसरांतील पाणीपुरवठ्याची वेळ निश्चित करण्यात आली आहे. त्यामुळे आता नागरिकांना पाणीपुरवठ्याच्या वेळेची माहिती लक्षात घेऊन दैनंदिन कामांचे नियोजन करता येणार आहे. दीड वर्षांपासून भेडसावणाऱ्या या समस्येवर तोडगा निघाल्याने संबंधित परिसरातील नागरिकांना दिलासा मिळण्याची अपेक्षा व्यक्त होत आहे.

नागरिकांनी वेळेची नोंद घ्यावी

संबंधित पाचही परिसरांतील नागरिकांनी निश्चित करण्यात आलेल्या पाणीपुरवठ्याच्या वेळेची नोंद घ्यावी आणि त्यानुसार आपल्या घरातील पाण्याचे नियोजन करावे, असे आवाहन नगरसेवक प्रविण (बंटी) तिदमे यांनी केले आहे.

पाणीपुरवठ्याच्या वेळेबाबत निर्माण होणारी अनिश्चितता दूर करून नागरिकांची गैरसोय कमी करण्याच्या दृष्टीने हा निर्णय महत्त्वाचा मानला जात आहे. आता निश्चित केलेल्या वेळापत्रकानुसार नियमित पाणीपुरवठा होतो का, याकडे परिसरातील नागरिकांचे लक्ष राहणार आहे.